Para poñer en valor, divulgar e conservar o conxunto patrimonial dos muíños do Folón e do Picón, así como potenciar a oferta turística da comarca e a ruta dos muíños como un espazo natural no que se poidan desenvolver actividades relacionadas co lecer e o turismo, o concello do Rosal promove o acondicionamento do punto de chegada cun espazo de esparexemento previo á ruta de interese cultural.

Abórdase este conxunto de actuacións con sobriedade, procurando que sexa a propia paisaxe e conxunto a protexer o que teña o protagonismo.

Aproveitando o diferente carácter de dúas zonas delimitadas pola topografía natural da paisaxe, na que a cota máis baixa conéctase co río e visualmente co val e outra cota máis alta, cun maior carácter forestal, organízanse en dúas áreas de actuación as necesidades previstas.

Por unha banda, unha bancada soluciona a contención do desnivel do terreo e exponse como unha aula ao aire libre que permite a explicación da ruta aos grupos de excursionistas ou estudantes.

Doutra banda, na cota máis alta, proxéctanse a zona de aparcamento e zona de descanso que integra un quiosco, unha área de mesas cuberta por unha malla metálica a modo de protector solar e un módulo de aseos públicos con punto limpo.

Para pechar a ruta circular aos muíños sen invadir a vía de tráfico rodado, constrúese unha ampla pasarela sobre o río totalmente de madeira.