Redes é unha casa unifamiliar construída entre medianeiras no centro urbano e mariñeiro da Guarda.

Con acceso desde dúas rúas moi estreitas, a construción encáixase entre as casas adxacentes e faise sitio para atopar a luz, as vistas, a organización funcional.

A planta baixa, de lado a lado e entre as dúas fachadas, constrúese sólida, como unha roca, negra, mexillóns, percebes. As fachadas das demais plantas revístense con aluminio, como as embarcacións. Unhas pasarelas de madeira facilitan a limpeza das ventás e funcionan como parasoles. Os vidros de cor lembran aos faros e reforzan o carácter pintoresco que caracteriza a fronte marítima ao redor do porto.