A pousada de Armenteira sitúase nunha contorna rural de fortes pendentes. A paisaxe configúrana os cultivos familiares na base dunha preciosa fraga, onde as néboas paran a descansar. A área está en protección de Patrimonio pola súa proximidade ao Mosteiro de Armenteira.

A parcela ten varias terrazas e magníficas vistas cara aos cultivos de explotación familiar, cara ao mosteiro e, ao lonxe, cara a ría de Arousa. Hai un forte vínculo co lugar. Constrúese a pousada co maior respecto cara á tradición, tanto nos materiais, pedra e madeira, como nas formas, trasladando a paz do mosteiro e a natureza ao proxecto.