Os promotores soñan con rehabilitar a súa casa da Guarda, na desembocadura do río Miño. Está emprazada nunha área de Rede Natura e de Protección de Costas. A fortuna de ser unha casa legalmente construída permítenos, mantendo o volume existente, realizar obras de consolidación e modernización. O proxecto abórdase con criterios de sobriedade e de respecto ao medio natural en que se encadra. A paisaxe marca un eixo transversal á casa formado pola unión de puntos singulares do territorio: costa de Portugal – río Miño – praia – piñeiros – casa “A Nora” – monte Santa Tegra – poboado castrexo; e a estratexia funcional e espacial é colocar sobre o devandito eixo a escaleira central da vivenda.