A rehabilitación integral do pazo promóvea a Misión Biológica de Galicia, pertencente ao Consejo Superior de Investigaciones Científicas, para establecer nel a xestión e dirección do centro así como para despachos de científicos, salas de reunión, sala de conferencias, arquivos, etc.

Ao abordar o proxecto e sen estendernos no programa de necesidades, fixémonos a seguinte pregunta: Como debemos intervir nun edificio de importante valor histórico, para transformalo nun uso para o que non foi concibido e dotalo das instalacións e espazos que require un centro destas características?

O edificio sufrira unha desafortunada intervención que desvirtuou totalmente o seu carácter orixinal, polo menos interiormente. Os forxados, así como os faldróns de cuberta sobre a cornixa, foran substituídos por forxados de formigón, e sen coherencia formal.

Baleiramos o edificio, recuperamos a visión dos primitivos muros, e reordenamos o sistema de circulacións para facelo apto para o novo uso. Elimínanse barreiras incorporando un ascensor e substituíndo as escaleiras que aproveitan as antigas varandas, pero cunha nova formulación estrutural.

Eliminamos todos os elementos que non pertenceron orixinalmente ao edificio e facemos visible o seu pasado esperando recoller a testemuña que temos que reinterpretar de novo para a consecución do novo proxecto.